Druslugangan 2016: Fín drusla

Druslugangan 2016: Fín drusla

Fín drusla

 

Orðin svíða, þegar hún segir við mig:

,,Þú ert fín drusla,,

Orðin stinga inn að beini, verða að sorg sem ég leyni

Skömmin sem mamma gat aldrei skilað

 

Innsti inni vissi ég að hún meinti þetta ekki

Orðin eru sögð undir áhrifum; þegar hún er í glasi og líður illa

Varpar eigin sjálfsmynd og minningum úr æsku yfir á mig

Þeim var ég verst er ég unni mest

Djúpur sársauki – arfleið kynmæðra/kynslóða

 

Amma mín var drusla að mati samfélagsins þegar hún var ung að árum

Á 5. áratugnum steig hún í vænginn við erlendan herra/hermann

Vogun vinnur vogun tapar

Hún var í ástandinu en ástandið innra með henni var öllu verra

þegar hann yfirgaf hana og landið ísilagða, þá var hún ekki kona einsömul

 

Frumburðurinn kom í heiminn, útskúfuð hélt hún sig heima í foreldraskýlinu

Í þrjá mánuði leit afinn ekki við sveininum í vöggunni

Tíminn vaggar með mildi augu mætast

Sá gamli tekur ástfóstri við barnið og allir kætast

þegar hann gengur því í föður stað

 

Steinvala verður að háu fjalli, árin færast yfir

Drungi nætur svíður burt dagsljós hugans

Kveikt er í glóð endurtekið, reykjamökkur er yfir gjörvallri stofu

Fyllir vit mín sígarettureyk, ég leggst ekki til hvílu af ótta við eld    

Vín slævir dómgreind og huggar um stund

Móðir mín góð, farðu nú að sofa svo ég geti sett vatn á öskubakkana

 

Skömmin býr í þögninni og nýr dagur rennur upp

Hún man ekki eftir að hafa sært mig kvöldið áður með orðum liðinna tíma

Þau fellu eitt sinn af vörum móður móður minnar seint um kvöld

slegin í framan með borðtusku, ásökuð um að hafa gert eitthvað ljótt

álitin drusla fyrir það eitt að njóta sín með vinkonum

 

Hvert átti hún að leita með leyndarmál fortíðar?

Sár sem lyf og vín fá ekki grætt er hún áttaði sig ekki á

Flóttinn frá kynferðisofbeldi í æsku kom upp á yfirborðið

rétt áður en hún tók eigið líf

 

Þú ert fín drusla eru orð sem særa

hafa fallið munn fram að munni

kynslóð fram af kynslóð

En verða að valdi er ég fyrirgef þér mamma og skila skömminni

þar sem hún á heima.

 

Höfundur: Kolbrún Dögg, 15.7.2016

Ljósmynd: Jónatan Grétarsson. Myndin sýnir Kolbrúnu Dögg túlka Ernu Ómarsdóttur dansara.

[Myndlýsing: Myndin er svarthvít og sýnir Kolbrúnu Dögg sitja í hjólastól. Myndin er tekin á hlið þannig einungis sést á vinstri hlið Kolbrúnar og svo virðist sem hún sé á fullri ferð á leið útúr myndinni. Hárið stundur upp í loftið líkt og það þeysist um vegna hraðans sem Kolbrún er á.]